البحر... قلعة الرمل... الفريسكا... العوامه البطة... وذكريات تانية كتير بترتبط مع معظمنا بالمصيف. لكن فى ذكري معينة تكاد تكون عدت علينا كلنا... وهى خزعبلات ان اللى يعوم بعد الأكل بيغرق! وبعد ما ناكل الساندويتشات كانت نص أمهات مصر بتجبر اولادها يقعدوا ربع أو نص ساعه عشان الأكل يتهضم وميجيش تشنجات فى العضلات اثناء العوم مما قد يتسبب فى الغرق.

 

وكان لازم نعرف هل المعلومات دى فعلاً حقيقة؟ ولا خزعبلات وخوف زيادة من الأهل على اولادهم؟

محدش قادر يحدد إمتى بالظبط بدأت الأمهات تقول الكلام ده لولادها. ولكن السبب العلمي اللي الناس بتستشهد بيه هو الآتى:

  • لما بتبدأ عملية الهضم،معظم الدم الموجود فى الجسم بيتوجه ناحية المعدة عشان يساعد
  • لما الدم بيتسحب من الجسم ويروح ناحية المعدة، الأطراف مبيوصلهاش الإمداد الكافى اللى يخليها قادرة علي ابسط الحركات

طيب هل الكلام ده حقيقي؟ أه ولأ!

  • فعلا الدم بيتوجه ناحية المعدة للمساعدة فى الهضم بعد تناول الوجبات،
  • بس الحقيقة هى ان جسم الإنسان فيه كمية كافية من الدم تخلي جميع أجزاء واعضاء الجسم تشتغل بكفاءة بعد الأكل عادي.
  • التشنجات العضلية ممكن تحصل اثناء العوم أو اي رياضة تانية بغض النظر عن الأكل من عدمه، وممكن يكون من مسبباتها الجفاف، التعب، الخلل العصبى... واسباب تانيه مختلفة.

مش بس كده، وقت ممارسة الرياضة بيقوم الجسم بإفراز مادة الأدرينالين واللى بتخلي الدم يحمل الأوكسيجين لأي عضلة محتاجه... واللي وقت العوم أكيد هتكون عضلات الأطراف! وبكده نقدر نقول بقلب جامد أن مفيش اي علاقه بين الهضم وتشنج العضلات.

طبعا الموضوع بيختلف علي حسب الوجبة.... وأكيد العوم بعد كيس شيبسى مش زى العوم بعد رغيف حواوشى! وده لأن الكربوهيدرات بتتكسر وتمتص أسرع كتير من الدهون والبروتين فممكن رغم كل شئ فكرة الإنتظار شوية بعد الأكل تكون فكرة تستحق التنفيذ.

 

خش عالمراجع:

- Melissa Conrad Stoppler, MD, Debunking Summer Health Myths, MedicineNet.com website, Available at: http://www.medicinenet.com/summer_debunking_summer_health_myths/views.htm

Peter Milburn, Professor, School of Rehabilitation Sciences at Griffith University, theconversation.com website, Available at: http://theconversation.com/mondays-medical-myth-wait-30-minutes-after-eating-before-you-swim-10653

-Claudia Hammond, MEDICAL MYTHS, bbc.com website, available at: http://www.bbc.com/future/story/20130401-can-you-swim-just-after-eating


بقلم: هبه علام