"إرحم عينيك... محدش يقرا فالضلمه كده.... نظرك هيضعف!" أو "هيبقي عندك 20 سنه ومش هتشوفي تلضمي الإبرة" أو "بلاش تمقق عينيك وتقرا فى الكحل ده".... وغيرها من الجمل اللى بتصر وتؤكد على إن القراءة فى الضلمه بتضر النظر. الكلام يكاد يكون مقنع، ماهو اصل الواحد بعد ما يخلص قراءة فى ضوء خافت أو على نور كشاف بيحس بإرهاق وأوقات صداع. طيب هل ده الألم ده معناه ان النظر ضعف؟ خلينا نشوف.

هنبدأ كلامنا عن العين نفسها، واللي بتتكون الشبكية فيها من نوعين من الخلايا المستقبلة للضوء وهما:

- خلايا مخروطية

- خلايا نبوتية (عصوية)

 

الخلايا المخروطية دي هي اللى بتمكن الإنسان من القراءة وتمييز الألوان وبتشتغل زي الفل فى الضوء الساطع نسبياً. أما الخلايا العصوية، فهى الخلايا اللي بتكشف عن الحركات اللى فى الرؤية المحيطية وبتساعد الإنسان إنه يشوف فى الإضاءة الخافتة ودى نقدر نقول انها فى طرطوفة الشبكية كده وانت خارج ودى خلايا حساسة ومسئولة مسئولية تامة عن الرؤية الليلية.

طيب إيه اللي بيحصل لما بنبدأ نقرأ فى الضلمة؟

- اللى بيحصل إن بمجرد ما النور ينطفى، العين بتتحول من الرؤية عن طريق الخلايا المخروطية للرؤية عن طريق الخلايا العصوية، واللى زى ما تقول كده بعافية شوية فى مهمة القراءة.

وبالتالي... لما بنحاول نقرأ فى الضلمة بنشعر بإرهاق فى العين نتيجة استخدام الخلايا الغلط... لكن بمجرد ما نفتح النور بتعود الأمور لطبيعتها وبيتبقي بس الإجهتد الناتج عن استخدام الخلايا النبوتيه فشغلانه مش شغلانتها.

يعنى نظنا مش بيضعف؟ لأ... مش بيضعف ومش بيتأثر، بس نظراً للإرهاق والإجهاد اللى ممكن يصيبنا يبقي يستحسن منقراش فى الضلمة لفترات طويلة أو منقراش فالضلمة خالص إلا لو للضرورة J

 

المراجع العلمية بقى:

  • Joseph Brownstein, ABC News Medical Unit, Doctors Explain the Truth Behind 11 Popular Eye Myths, available at: http://abcnews.go.com/Health/EyeHealthNews/11-eye-myths-debunked/story?id=8919023
  • Anahad O'Connor, The Claim: Reading in the Dark Will Damage Your Eyes, available at: http://www.nytimes.com/2006/07/04/health/04real.html?_r=0
  • -  Brian S. Boxer Wachler, MD, Myths About Your Eyes and Vision, available at: http://www.webmd.com/eye-health/fact-fiction-myths-about-eyes

 

بقلم: هبه علام