خرج علينا من فترة أحد الأفلام الأجنبية، اللي بيرتكز علي معلومة ان الإنسان بيستخدم 10% من قدرته الدماغية... وفي الفيلم استطاعت البطلة انها توصل لنسب أعلي لغاية ما وصلت ل100%... واللي شاف الفيلم اكيد شاف تطورات قدراتها وازاي كانت بتتحكم فنفسها وفي اللي حواليها وفي المواد والطاقة والموجات... وإزاى مشيت عالحيطه وطلعت كهربا من بؤها!

طيب هو احنا فعلاً بنستخدم 10% بس؟ ولا بتختلف من انسان للتاني؟ ولو انا عاوزه امشى علي الميه أو اقلب الشاي من غير ما امسك المعلقة ايه اللى المفروض اعمله؟

خلينا بس قبل ما نتعشم نوضح إن المعلومة دى غير صحيحة... خزعبلايه ظهرت فى اواخر القرن ال18 وكذا مرة بيتم نسبها لأحد العلماء، بما فيهم اينشتاين! المعلومة المغلوطه دى بتتردد بتتردد كل كام سنه وللأسف يميل الكثير من الناس لتصديقها، وإزاى ما تتصدقش وهى بتظهر فى وسائل إعلامية مختلفة وبرامج ومقالات وكتابات... لدرجة انها وصلت للسينما!

تعالوا بقى نشوف الأدلة اللى بتؤكد إن كل جزء فى مخ الإنسان له وظيفة وعمل وإنه المخ معظم أجزاءه تعمل بلا توقف سواء واحنا صاحيين أو واحنا نايمين:

  1. لو 90% من المخ غير مستخدمين، معنى كده إن أى ضرر يحصل فى أى جزء منهم مس هيأثر على الإنسان. وده مش حقيقى... لأن اقل ضرر بيحصل فأصغر جزء من المخ ممكن يتسبب فى فقدان لبعض القدرات.
  2. المسح الدماغي بيظهر إن مهما كان الإنسان بيعمل إيه فالمخ دايما شغال! ممكن تكون بعض أجزاء المخ نشيطة عن الأجزاء التانية إعتمادا على الحاجه اللى الإنسان بيعملها وقتها... لكن لا يمكن اى جزء يكون مش شغال.
  3. رغم إن المخ بيمثل حوالى 2% من جسم الإنسان، إلا انه أكبر عضو بيستهلك طاقة فالجسم! المخ لوحده بيحتاج حوالى 20% من الطاقة بالإضافة إلى الأوكسيجين والمغذيات. لو 90% من مخ الإنسان مبيشتغلوش... كان زمان الجسم استناداً علي نظريات التطور وفر علي نفسه وقلص حجم المخ عشان يستفيد بالطاقة اللي بتضيع دى.
  4. الأشعات الدماغية المختلفة اللي بتسمح بمراقبة نشاط المخ بينت إن حتي وقت النوم بيكون فى نشاط فى جميع أجزاء المخ.
  5. بعد سنين من الأبحاث ومحاولة عمل خرائط للمخ، الدراسات اثبتت إن المخ مش بيشتغل ككتله واحده، بالعكس ده متقسم لمناطق وكل منطقة مسئولة عن معالجة نوع معين من البيانات... ومفيش ولا دراسة وجدت أى مناطق بدون وظيفة.
  6. فى حالة أمراض الأعصاب، الخلايا العصبية اللى مش بيتم إستخدامها بتتعرض للتحلل... وكان مثال على ذلك هو أحد الحالات اللي تعرضت لنقص فى محفزات الرؤية فى سنين التطور الأولي... وده أثر على الأعصاب الخاصة بالرؤية واللى اتعرضت للتحلل نظرا لعدم استخدامها. وده معناه إن لو 90% من المخ مش مستخدم كان تشريح المخ أظهر وجود 90% من الخلايا المتحللة وده محصلش!

كل إنسان له قدراته الخاصة، فى ناس شاطره فى الرسم... وناس متعرفش تمسك الفرشة... ناس بتعزف، ناس بتبرمج، ناس بتخترع، ناس بتكتب.... بس فى النهاية كلنا بنستخدم 100% من قدراتنا الدماغية. عشان كده المرة اللى جايه اللى تقرا فيها قصة أو كتاب أو تتفرج علي فيلم بيعتمد عالخزعبلايه دى.... استمتع بيه كخيال علمي... بس خليك متأكد إن انت سوبر.

 

مراجع الكلام اللى فوق ده هى:

 

-B.L. Beyerstein, Whence Cometh the Myth that We Only Use 10% of Our Brains? in Mind Myths. Exploring Popular Assumptions about the Mind and Brain edited by S. Della Sala, Chichester: John Wiley and Sons, pages 3-24, 1999.

-Dr. Eric H. Chudler, Do We Use Only 10% of Our Brains?, Neuroscience For Kids, available at: https://faculty.washington.edu/chudler/tenper.html

-Robynne Boyd, Do People Only Use 10 Percent of Their Brains?, Scientific American, available at: http://www.scientificamerican.com/article/do-people-only-use-10-percent-of-their-brains/

 

بقلم: هبه علام