من أول يوم اتعرفت على أكاديمية التحرير صدقت اوى فكرتها...لان فى دراستي قررت انى أبطل دروس واعتمدت فى دراستى على فيديوهات التعليمية فكنت عارفة قد ايه هتعمل فرق.

ولما شفت فيديوهات أكاديمية التحرير حلمت انها توصل للطلبة اللى مش بيقدروا يدخلوا على الانترنت...واتكلمت مع واحدة من المسئولين فى أكاديمية التحرير عن الفكرة دى وشجعتني جدا وان مفيش اي مشكلة انى استعمل الفيديوهات ولو محتاجة اى حاجة هيبقوا جنبي.

 

وبدأت رحلة البحث ...ووصلت ل"نبني" ...مؤسسة تنموية هدفها تنمية منطقة منشية ناصر..ودخلت نبني ومخرجتش :)

 وبدأت اشتغل مع مجموعة من الأطفال نبني وكنا بنحاول ننميهم اكتر عن طريق مشروع اسمه "أطفالنا" هدفه تنمية الأخلاق عن طريق أنشطة منها الرسم والعلوم والمسرح.

وفى فريق العلوم بدأ حلمى الصغير يتحقق ...عرضنا مجموعة من فيديوهات أكاديمية التحرير على الأولاد. كان واحد من أكتر الفيديوهات اللى علقت معاهم فيديو "العطس" ...وكان سعادة غير عادية لما تسأل الولاد ازاى تعطسوا بعديها بفترة فيعملوا صح!

بعد كده قررت انقلهم لمستوي أعلى وشرحنا الجهاز العصبي. هو مقرر فعلا على المرحلة الابتدائية، وطريقة فيديوهات أكاديمية التحرير للموضوع ده كانت مميزة جدا. كانت مفاجأة بالنسبة ليا انهم استمتعوا جدا بالموضوع، وتسمع الاطفال يتكلموا عن أجزاء المخ المختلفة ، وازاى الاشارات بتتنقل، ولما تسألهم النخاع الشوكى وظيفته ايه؟ فتلاقيهم بيردوا زي الرجل بتاع الديليفرى :D نفس التشبيه اللى فى الفيديوهات بالضبط

بعد كده ومع تطور الولاد السريع بدأنا نساعد الاولاد فى مناهجهم الدراسية وبدات دروس التقوية، وكان فصلى مجموعة من اشطر الولاد فى الصف السادس الابتدائى وبدأوا يتعرفوا على العلوم بشكل أوسع.

وظهرت أهمية واحدة من أهم الكورسات اللى أكاديمية التحرير نفذتها "معمل العلوم" اعتمدنا عليها بشكل رئيسى أثناء الشرح.عبقرية الكورس ده انها بتنقل الولاد داخل المعمل ويشوفوا التجارب اللى نتيجة ضعف امكانيات المدارس مش بيقدروا يشوفوها!

تجارب توضح المواد الموصله للحرارة، و ازاى نعمل ترميموتر منزلى، واكتشاف غاز الأكسجين وثاني أكسيد الكربون وغيرها كتير.

              

وفى الترم التانى كانت مستنياني واحدة من أفضل اللحظات.كان عندهم الجهاز العصبى وكان يفصلهم شهور عن المرة اللى شرحناه فيها اول مرة. مع التوضيح ان اول مرة كان مجرد استماع ومشاهدة من غير كتب، المفاجأة أنهم كانوا فاكرين الدرس كله وفاهمينه وبيتكلموا عنه كأنه أسهل درس فى الدنيا،ساعتها أيقنت أن أكاديمية التحرير تقدر تعمل فرق حقيقى فى التعليم!

ولأن الواحد اتعلم من أكاديمية التحرير أن هدفنا "جيل فاهم مش حافظ" ولأن فى نبني بنحاول نقدم للولاد تجربة تعليمية مختلفة، فقررنا نشرح كل فترة معنى جديد وكان من افضل التجارب "خلية شو"، الفكرة الاساسية للخلية وتركيبها كانت فى منتهى الوضوح ومقدمة بشكل مبهر للعين، الولاد كانوا بيغنوا الأغنية اللى فى المقدمة.

دلوقتى كل ما بنتكلم عن الاحياء نفتكر الخلية!

 

الولاد بقوا فى أولى اعدادى ورحلتهم مع أكاديمية التحرير لسة مستمرة. بداية منهجهم كانت فيها مواضيع فيزيائية، فاتعرفوا اكتر عن معني كلمة فيزياء وتطبيقاتها بفديوهات "حجر وحجرجر" ومقدمة فى الفيزياء وكملوا رحلتهم مع معمل العلوم واتعرفوا عن الكثافة والصدا ومفاهيم تانية كتير!

السعادة ان الولاد دلوقتى قبل كل حصة علوم لازم حد يطلع يكتب على السبورة "فاهم مش حافظ" ، حوارتهم ونقاشاتهم اتطورت بشكل مذهل ...أغلب الأسئلة بقولهم هرجع ادور عليها واقولكم :D

 

أكاديمية التحرير تجربة فريدة، وانك توصلها للناس متعة وقيمة وسعادة بلا حدود. الجيل الجديد من حقه يتعلم بطريقة مختلفة تحترم عقله والتطور التكنولوجى اللى عايشين فيه. من حق الجيل الجديد يتعلم حاجات احنا مكناش نعرفها ...يعرف يعني ايه "تفكير نقدى" ويعرف ان العلم مش كتاب المدرسة والجامعة وانه متعة حقيقية.

ومشروع "انزل علم " اثبت اننا نقدر نعمل تغيير حقيقى فى التعليم. واحدة من الحقائق المرعبة ان اطفال كتير سابوا مدرستهم علشان العنف المدرسى،هيفضلوا طول عمرهم بيعانوا من جهل بسبب تقصيرنا فى حمايتهم وتوفير بيئة أمنة ليهم.

"انزل علم " ده حق جيل كامل علينا وأمانة لازم نأديها.


تقدر تبدأ في انزل علّم من هنا

ايه هو "انزل علّم"؟

مشروع بدأته أكاديمية التحرير عشان تمكّن المعلم و/او أي شخص يقدر يقوم بالدور ده انه يقدم للمتعلمين تجربة تعليمية محفزة للعقول. و ده من خلال توفير 3 حاجات:

  • محتوي تعليمي يعتمد علي الفهم و يتعامل مع احتياجات المتعلم و تفاعلة مع المحتوي كأولوية.
  •  دليل الكتروني لاستخدام المحتوي.
  • موقع تعليمي بيقدم تجربة تفاعلية عن طريق استخدام اساليب و عناصر الألعاب في التعليم (gamification).

مين يقدر يشارك في "انزل علّم"؟

أي شخص يقدر يشارك في "انزل علم". المهم انه يكون يقدر يوصل أو بيتعامل مع المتعلمين في مرحلة الاعدادي و الثانوي في اي سياق و أي مكان بأي عدد. و يكون مؤمن بدور التعليم و أهمية تطويره عن طريق تقديم تجارب تعليمية مختلفة و أكثر فعالية للمتعلم.

ممكن الشخص يقدم ده للطلبة بتوعه في الفصل أو في مؤسسه مجتمعية, لأولاده أو لأخواته أو قرايبه في السن ده, لجيرانة في الشارع بتاعه... الخ.

ليه "انزل علّم"؟

مهمتنا في أكاديمية التحرير هي توفير تجربة تعليمية محفزة لعقول لطلبة الاعدادي و الثانوي لبناء جيل من المصريين يقدر يفكر و يقرر ويختار في حياته اليومية ومستقبله. و ده بدأ من خلال طرح حلول غير تقليدية تساعد على توفير العلوم و المعرفة عن طريق استخدام التكنولوجيا و الإنترنت وتقديم تجربة تعتمد علي الفهم بدلا من الحفظ.

 لكن عشان نقدر نوصل لأكبر قدر من الاستفادة  محتاجين قوة المجتمع اللي يقدر يوصل لأكبر قدر من المتعلمين - خاصة اللي مش بيوصلهم الانترنت – و ده من خلال مشروع انزل علم.