ازاي تشارك في  "انزل علّم"؟

الموضوع بسيط و يتلخص في 3 خطوات، هتلاقيهم في الرسم التوضيحي ده:

 

عشان تنفذ تجربة تعليمية من خلال انزل علّم هنساعدك بخطوات بسيطة بنقترحها لتقديم التجربة:

   1.اعرف عن المتعلم بتاعك علي قد ما تقدر:

  • الشريحة العمرية (سواء تشمل او جزء من الشريحة المستهدفة في اكاديمية التحرير "من 13-18")
  • المرحلة التعليمية و المستوي التعليمي.
  • عدد المتعلمين أثناء التجربة التعليمية
  • الاهتمامات المشتركة بين المتعلمين (ان وجد)
  • الفجوه العلمية: أعرف المُتعلم محتاج يتعلم ايه؟ (اذا مُتاح)

   2. اختار الكورس المناسب من محتوي أكاديمية التحرير:

  • زور موقعنا www.tahriracademy.org   و استكشف الكورسات المقدمة في العلوم المختلفة و اختار الكورس المناسب حسب دراستك للمتعلم و قدرتك علي شرح الكورس.
  • هنا ممكن تلاقي قائمة بالكورسات المُتعلقة بالمنهج الدراسي لأعدادي و الثانوي اضغط هنا 
  • و هنا هتلاقي قائمة بكورسات أكاديمية التحرير كلها: http://goo.gl/hYxg2N

    3. خطّط للتجربة التعليمية:

  • حدد الوقت المتاح: عدد الساعات و/أو الايام.
  • المكان: مهم تبقي عارف عن المساحة و البيئة التعليمية اللي هتقدم فيها التجربة. ممكن يبقي اي مكان طالما مناسب للمتعلم و مش بيأثر سلباً علي التجربة التعليمية.
  • حدد التاريخ المناسب.

      4. صمم التجربة التعليمية: (و مهم تاخد الخطوات التلاتة اللي فاتوا في الاعتبار)

      في 3 عناصر مهمه هتحتاج تستخدمها في التجربة التعليمية:

  • المحتوي التعليمي المناسب من كورسات أكاديمية التحرير.
  • النقاشات المفتوحة:
    • افتح نقاش قبل تقديم المحتوي لاستكشاف خلفية المتعلم في الموضوع, اثارة فضولة المعرفي, تحفيزه تجاه المادة العلمية..الخ
    • و كذلك بعد تقديم المحتوي لتقييم فهمه للمحتوي, تحفيزه للتساؤل, تشجيع سلوك التفكير النقدي, ... الخ.
  • نشاط تفاعلي: حدد نشاط يقوم بيه المتعلم فردي او في مجموعة بيعكس و بيطبق المعرفة المقدمة في المحتوى، كمان يساعده انه يفهم المحتوى اكتر. ممكن النشاط يكون مثلا تجربة عملية, مهمة بحثية, تقديم عرض, ... الخ.

 

       و عشان تصمم ال 3 عناصر اللي فاتت هتحتاج:

  • تفهم المحتوي كويس.
  • تحضر الأسئلة اللي هتيسّر و هتفتّح النقاشات.
  • تفكر في نوع النشاط الأمثل للمحتوي و طبيعة المتعلمين و المساحة المتاحة في الوقت و المكان و اللي ممكن يعكس المحتوي نفسه او مهارة ممكن يكتسبها من المحتوي بطريقة مباشرة او غير مباشرة.
  • لو احتجت ممكن تعمل بحث بسيط عن المحتوى يساعدك في التحضير للنقاشات او النشاط.

 

   5. حضر الأدوات اللي محتاجها (إن وجد) لتنفيذ النشاط, تيسير النقاشات أو عرض المحتوي.

 

   6. احكيلنا عن تجربتك: ده مش بس هيحفز غيرك كتير انهم يشاركوا في "انزل علّم" بس كمان هيساعدنا في تقديم محتوي اقرب لاحتياج المتعلّم و تطوير الادوات اللي بتقدمها اكاديمية التحرير للمتعلمين. ابعتلناصور للتجربة على enzel3allem@tahriracademy.org مع ذكر المكان و الكورس اللي استخدمته.

لو حابب تحكيلنا أكتر عن تجربتك املى الاستمارة ديه: هنا

 

     - ملحق (2) هنا بيجمع القيم التعلُمية اللي بنؤمن بيها في أكاديمية التحرير و انها بتُيسر التعلُم، حاول انها تكون موجودة في تجاربك.

 

 


أسئلة مهمة بتتسأل دايماً:

 

ليه "انزل علّم"؟

مهمتنا في أكاديمية التحرير هي توفير تجربة تعليمية محفزة لعقول لطلبة الاعدادي و الثانوي لبناء جيل من المصريين يقدر يفكر و يقرر ويختار في حياته اليومية ومستقبله. و ده بدأ من خلال طرح حلول غير تقليدية تساعد على توفير العلوم و المعرفة عن طريق استخدام التكنولوجيا و الإنترنت وتقديم تجربة تعتمد علي الفهم بدلا من الحفظ.

 لكن عشان نقدر نوصل لأكبر قدر من الاستفادة  محتاجين قوة المجتمع اللي يقدر يوصل لأكبر قدر من المتعلمين - خاصة اللي مش بيوصلهم الانترنت – و ده من خلال مشروع انزل علم.

 

ايه هو "انزل علّم"؟

مشروع بدأته أكاديمية التحرير عشان تمكّن المعلم و/او أي شخص يقدر يقوم بالدور ده انه يقدم للمتعلمين تجربة تعليمية محفزة للعقول. و ده من خلال توفير 3 حاجات:

  • محتوي تعليمي يعتمد علي الفهم و يتعامل مع احتياجات المتعلم و تفاعلة مع المحتوي كأولوية.
  •  دليل الكتروني لاستخدام المحتوي.
  • موقع تعليمي بيقدم تجربة تفاعلية عن طريق استخدام اساليب و عناصر الألعاب في التعليم (gamification).

 

مين يقدر يشارك في "انزل علّم"؟

أي شخص يقدر يشارك في "انزل علم". المهم انه يكون يقدر يوصل أو بيتعامل مع المتعلمين في مرحلة الاعدادي و الثانوي في اي سياق و أي مكان بأي عدد. و يكون مؤمن بدور التعليم و أهمية تطويره عن طريق تقديم تجارب تعليمية مختلفة و أكثر فعالية للمتعلم.

ممكن الشخص يقدم ده للطلبة بتوعه في الفصل أو في مؤسسه مجتمعية, لأولاده أو لأخواته أو قرايبه في السن ده, لجيرانة في الشارع بتاعه... الخ.