من صغري وانا بحب العلوم لأنها مادة مشوقة ومش بتعتمد علي الحفظ عشان كده اخترت اكون مدرسة علوم .

بس كان نفسي في كل مرة ادخل فيها الفصل يكون معايا وسيلة ابسط بيها الشرح ونخرج بيها عن جو الروتين في طريقة الشرح المعتمدة علي الكتاب والكراسة والسبورة واجذب انتباه الطلبة

وفعلا دورت كتير ولحبي للكمبيوتر ورغبتي في ربط العلوم كمادة علمية بالتكنولوجيا  فكان البحث عن وسائل تعليمية علي الانترنت

 

كانت المشكلة في الأول ان كل الفيديوهات عامة ومش مخصصة للمناهج ومع البحث  وصلت لفيديوهات اكاديمية التحرير وفرحت جداااا لما لقيت ان الفيديوهات دي تعليمية من الدرجة الأولي لمراحل التعليم المختلفة ومبسطة جدا فبدأت استخدمها  لكل مراحل الإعدادي حتي التجارب الكيميائية للصف الثالث الإعدادي الي صعب نعملها في المعمل  

 

رد فعل الطلبة كان رائع جدا وبدؤا يطلبوا مني يتفرجوا علي فيديوهات كتير كانت الفيديوهات بالنسبة لهم شرح وتأكيد للمرة التانية  

 

بدأت اعرض لهم كمان فيديوهات من خارج المنهج لتفسير بعض الظواهر زي " ليه الثلج لونه ابيض ؟ "  " ليه السماء لونها ازرق ؟ " وغيرها كتير كان التشويق والإبتسامة علي  وجوهم سمة عامة حتي الطلبة الي كانوا بيغيبوا كانوا بيطلبوا مني اني اعرض الفيديوهات تاني واني اعرفهم علي موقع اكاديمية التحريرالي ممكن يلاقوا فيه الفيديوهات دي  .

من تجربتي الشخصية احب انصح كل المدرسين في كل المجالات ان يربطوا التعليم بالتكنولوجيا ويخرجوا من حدود الشرح الروتيني في الفصل ويستخدموا فيديوهات اكاديمية التحرير في الشرح لأن هي دي سمة العصر الحالي والأجيال الحالية  وحتكون ان شاء الله خطوة ناجحة ومشرفة للنهوض بنظام التعليم  

 

 

تقدر تبدأ في انزل علّم من هنا

ايه هو "انزل علّم"؟

مشروع بدأته أكاديمية التحرير عشان تمكّن المعلم و/او أي شخص يقدر يقوم بالدور ده انه يقدم للمتعلمين تجربة تعليمية محفزة للعقول. و ده من خلال توفير 3 حاجات:

  • محتوي تعليمي يعتمد علي الفهم و يتعامل مع احتياجات المتعلم و تفاعلة مع المحتوي كأولوية.
  •  دليل الكتروني لاستخدام المحتوي.
  • موقع تعليمي بيقدم تجربة تفاعلية عن طريق استخدام اساليب و عناصر الألعاب في التعليم (gamification).

مين يقدر يشارك في "انزل علّم"؟

أي شخص يقدر يشارك في "انزل علم". المهم انه يكون يقدر يوصل أو بيتعامل مع المتعلمين في مرحلة الاعدادي و الثانوي في اي سياق و أي مكان بأي عدد. و يكون مؤمن بدور التعليم و أهمية تطويره عن طريق تقديم تجارب تعليمية مختلفة و أكثر فعالية للمتعلم.

ممكن الشخص يقدم ده للطلبة بتوعه في الفصل أو في مؤسسه مجتمعية, لأولاده أو لأخواته أو قرايبه في السن ده, لجيرانة في الشارع بتاعه... الخ.

ليه "انزل علّم"؟

مهمتنا في أكاديمية التحرير هي توفير تجربة تعليمية محفزة لعقول لطلبة الاعدادي و الثانوي لبناء جيل من المصريين يقدر يفكر و يقرر ويختار في حياته اليومية ومستقبله. و ده بدأ من خلال طرح حلول غير تقليدية تساعد على توفير العلوم و المعرفة عن طريق استخدام التكنولوجيا و الإنترنت وتقديم تجربة تعتمد علي الفهم بدلا من الحفظ.

 لكن عشان نقدر نوصل لأكبر قدر من الاستفادة  محتاجين قوة المجتمع اللي يقدر يوصل لأكبر قدر من المتعلمين - خاصة اللي مش بيوصلهم الانترنت – و ده من خلال مشروع انزل علم.