مهام المعلم في تجربة إنزل علم هتكون كالآتي :

  1. تصميم التجربة التعلمية بحيث تشمل :
    -الكورسات المختارة من الأكاديمية
    -شكل الفصل
    -الأنشطة التي هيمارسها الطلاب بجانب مشاهدة الفيديوهات

  2. توثيق التجربة على موقع أكاديمية التحرير

  3. تيسير دخول المتعلمين على الموقع وتيسير حصولهم على المواد العلمية

  4. التواصل الدائم بالمقترحات أو الاستفسارات لتحسين التجارب عامة عن طريق تبادل الخبرات بين الجميع



اشتراكك في انزل علم معناه مساهمتك في خلق جيل جديد بيفكر بشكل مختلف وفاهم هو بيدرس ايه مش بيذاكر علشان الامتحان وخلاص وبيساهم في تحسين العملية التعليمية بشكل جذري علشان يكون خطوة في أن ده يكون أسلوب حياة عند الطلاب يستمر معاهم  طول عمرهم

 

أسئلة مهمة بتتسأل دايماً:

ليه "انزل علّم"؟

مهمتنا في أكاديمية التحرير هي توفير تجربة تعليمية محفزة لعقول لطلبة الاعدادي و الثانوي لبناء جيل من المصريين يقدر يفكر و يقرر ويختار في حياته اليومية ومستقبله. و ده بدأ من خلال طرح حلول غير تقليدية تساعد على توفير العلوم و المعرفة عن طريق استخدام التكنولوجيا و الإنترنت وتقديم تجربة تعتمد علي الفهم بدلا من الحفظ.

 

لكن عشان نقدر نوصل لأكبر قدر من الاستفادة  محتاجين قوة المجتمع اللي يقدر يوصل لأكبر قدر من المتعلمين - خاصة اللي مش بيوصلهم الانترنت – و ده من خلال مشروع انزل علم.

ايه هو "انزل علّم"؟

مشروع بدأته أكاديمية التحرير عشان تمكّن المعلم و/او أي شخص يقدر يقوم بالدور ده انه يقدم للمتعلمين تجربة تعليمية محفزة للعقول. و ده من خلال توفير 3 حاجات:

محتوي تعليمي يعتمد علي الفهم و يتعامل مع احتياجات المتعلم و تفاعلة مع المحتوي كأولوية.

دليل الكتروني لاستخدام المحتوي.

موقع تعليمي بيقدم تجربة تفاعلية عن طريق استخدام اساليب و عناصر الألعاب في التعليم (gamification).

مين يقدر يشارك في "انزل علّم"؟

أي شخص يقدر يشارك في "انزل علم". المهم انه يكون يقدر يوصل أو بيتعامل مع المتعلمين في مرحلة الاعدادي و الثانوي في اي سياق و أي مكان بأي عدد. و يكون مؤمن بدور التعليم و أهمية تطويره عن طريق تقديم تجارب تعليمية مختلفة و أكثر فعالية للمتعلم.

ممكن الشخص يقدم ده للطلبة بتوعه في الفصل أو في مؤسسه مجتمعية, لأولاده أو لأخواته أو قرايبه في السن ده, لجيرانة في الشارع بتاعه... الخ.

 

تقدر تبدأ فوراً من هنا باستخدام دليل المعلم  : http://www.tahriracademy.org/go-teach/15
وسجل معانا من خلال الاستمارة دي علشان توصلك نصائح وارشادات وآخر مستجدات المشروع